ក្រុមប្រជាពលរដ្ឋរងគ្រោះចំនួន៣ភូមិដែលផ្ទះនិង ដីធ្លី របស់ពួកគាត់នៅក្បែររបងអាកាសយានដ្ឋានអន្តរជាតិភ្នំពេញពីខាងត្បូង កំពុងតែប្រឈមនឹងការរឹបអូសយកដោយគ្មានសំណងពីអាជ្ញាធរ បានឲ្យទស្សនាវដ្ដីសារព័ត៌មានសេរីដឹងថា កាលពីម្សិលមិញមនុស្សមួយក្រុមបានចុះមកវាស់វែងដីធ្លីរបស់ពួកគាត់ដោយមិនបង្ហាញអត្តសញ្ញាណនិងគម្រាមកំហែងពួកគាត់មិនឲ្យថតសកម្មភាពរបស់ពួកគេទៀតផង ។ការនេះធ្វើឲ្យមានក្ដីងឿងឆ្ងល់ថា តើអ្នកទាំងនោះជាពួកចោរ ឬ មន្ត្រីសាធារណៈរបស់រដ្ឋ ?
ប្រជាពលរដ្ឋដែលសុំលាក់ឈ្មោះព្រោះតែការព្រួយបារម្ភពីសុវត្ថិភាព បាននិយាយថា ពួកគាត់បានប្រើប្រាសទូរស័ព្ទដៃ ដើម្បីផ្ដិតយករូបភាពទាំងនោះ ទុកឲ្យអ្នកសារព័ត៌មាន តែត្រូវបានគេចាប់យកទូរស័ព្ទ ហើយលុបរូបភាពទាំងអស់នោះចោលវិញ ហើយគម្រាមមិនឲ្យថតបន្តទៀត ។ ករណីនេះ ត្រូវបានប្រជាពលរដ្ឋនិយាយថា ប្រសិនបើអ្នកទាំងនោះជាមន្ត្រីសាធារណៈរបស់រដ្ឋ គួរតែត្រូវបានអ្នកនុវត្តន៏ការងារនេះ ដោយតម្លាភាព ស្របច្បាប់ ដោយមិនគួរលាក់លៀមញញើតញញើមបែបនេះទេ . បើមិនអញ្ចឹងអ្នកទាំងនោះគឺជាពួកចោរ ?
ក្រុមប្រជាពលរដ្ឋជាង១រយគ្រួសាររស់នៅ៣ភូមិក្នុងសង្កាត់ ចោមចៅ ខណ្ឌ ពោធិ៏សែនជ័យ ដែលខ្លះរស់នៅ ៥ឆ្នាំ និង ខ្លះទៀត១០ឆ្នាំ ដោយមានការទទួលស្គាល់ពីអាជ្ញាធរ សង្កាត់ ខណ្ឌ ហើយ សុខៗក៏អាជ្ញាធរនឹកឃើញដេញពួកគាត់ដូចសត្វធាតុ ពេលនេះកំពុងស្វះស្វែងរកយុត្តិធម៌ និងសំណង ។
ក្រុមមន្ត្រីអង្គការសង្គមស៊ីវិលធ្វើការទាក់ទងសិទ្ធិលំនៅដ្ឋានបាននិយាយថា ឱសានវាទនៃការរុះរើផ្ទះរបស់ប្រជាពលរដ្ឋដែលទុករយៈពេលមួយសប្ដាហ៏នោះ បានបញ្ចប់កាលពីថ្ងៃព្រហស្បតិ៏ ហើយវិធានការបែបនេះ គឺ ផ្ទុយទាំងស្រុងទៅនឹងច្បាប់ភូមិបាលរបស់ប្រទេសកម្ពុជា។
ជាការកត់សម្គាល់បញ្ហាដីធ្លីដែលបានក្លាយជាអណ្ដាត់ភ្លើង ឆេះឆាបកម្ពុជាស្ទើរគ្រប់ទីកន្លែងនាពេលនេះ ភាគច្រើនបណ្ដាលមកពីការរំលោភបំពានរបស់អ្នកមានអំណាច មានលុយ និង រដ្ឋាភិបាលខ្លួនឯងតែម្ដងទៅលើកម្មសិទ្ធិរបស់ប្រជាពលរដ្ឋដោយពុំបានខ្វល់ពីច្បាប់ ៕
No comments:
Post a Comment