ក្រុមហ៊ុន​ទទួល​ដី​សម្បទាន​ជាង​១០០​កំពុង​បំផ្លាញ​បរិស្ថាន និង​បរបាញ់​សត្វ​នៅ​កម្ពុជា

រដ្ឋាភិបាល​កម្ពុជា​កន្លង​មក​បាន​សម្បទាន​អាជ្ញាប័ណ្ណ​រុក​រក​រ៉ែ​ទៅ ​ឲ្យ​ក្រុមហ៊ុន​ឯក​ជន​បរទេស និង​ក្នុង​ស្រុក ប្រមាណ ១២៨​ក្រុមហ៊ុន ក្នុង​ការ​រាវ​រក​រ៉ែ​របស់​ប្រទេស។
ភ្នាក់ងារ​ព័ត៌មាន​ចិន​ស៊ីនហួរ កាល​ពី​ថ្ងៃ​សុក្រ​បាន​ដក​ស្រង់​របាយការណ៍​មួយ ដែល​មាន​ចំណង​ជើង​ថា «ការ​ប៉ះ​ទង្គិច​ផ្នែក​បរិស្ថាន​សង្គម​ដោយ​សារ​បញ្ហា​រ៉ែ» បាន​ចេញ​ផ្សាយ​ថា ក្រុមហ៊ុន​ឯក​ជន​ដែល​ទើប​ទទួល​បាន​អាជ្ញាប័ណ្ណ​រ៉ែ​ទាំង​នោះ កំពុង​ប្រតិបត្តិការ​ជីក និង​បរបាញ់​សត្វ​ព្រៃ​របស់​កម្ពុជា​សឹង​ពេញ​ផ្ទៃ​ប្រទេស។
បណ្ដាញ​ឃ្លាំ​មើល​អំពី​ឧស្សាហកម្ម​រ៉ែ​សង្គម និង​ការ​ប៉ះ​ទង្គិច​ផ្នែក​បរិស្ថាន​បាន​រាយ​ការណ៍​ថា ក្រុមហ៊ុន​រុក​រក​រ៉ែ​ចំនួន ១២៨​នោះ បាន​បោះ​ទី​តាំង​នៅ​ក្នុង​ខេត្ត​ចំនួន​១៨ លើ​ផ្ទៃ​ដី​ទំហំ ២​ម៉ឺន ៤​ពាន់ គីឡូ​ម៉ែត្រ ស្មើ​នឹង ១៣% នៃ​ផ្ទៃ​ដី​ប្រទេស​កម្ពុជា​ទាំង​មូល ទំហំ ១៨១.០៣៥​គីឡូ​ម៉ែត្រ​ការ៉េ។
ក្រុម​នេះ​ក៏​បាន​ឲ្យ​ដឹង​ផង​ដែរ​ថា ក្រៅពី​ក្រុមហ៊ុន​ឯក​ជន​ក្នុង​ស្រុក ក៏​មាន​ក្រុមហ៊ុន​បរទេស​មក​ពី​ប្រទេស​ចិន វៀតណាម ថៃ កូរ៉េ​ខាង​ត្បូង សិង្ហបុរី សហ​រដ្ឋ​អាមេរិក និង​ប្រទេស​បារាំង៕