រូបភាពបង្ហាញពីទីតាំងឧទ្យានជាតិវីរៈជ័យ
អនុក្រឹត្យដែលចុះហត្ថលេខាដោយលោកនាយករដ្ឋមន្រ្តី ហ៊ុន សែន កាលពីថ្ងៃទី១៩ ខែឧសភា បានប្រគល់ដីក្នុងឧទ្យានជាតិវីរៈជ័យទំហំ៧០៧៩ហិកតាទៅឲ្យក្រុម ហ៊ុនហ្វូស៊ឹងហៃ (Fu Sheng Hai Cambodia) ដើម្បីដាំដើមកៅស៊ូ និងដំណាំផ្សេងៗទៀតក្នុងស្រុកតាវែង និងអណ្តូងមាស ខេត្តរតនគិរី។ ហើយដូចគ្នានេះដែរ ក្រុមហ៊ុន ជីងចុងធាន (Jing Zhong Tian) ក៏ត្រូវបានទទួលដីសម្បទានចំនួន៩៩៣៦ហិកតាផងដែរនៅក្នុងស្រុក តាវែង។
ការផ្តល់ដីសម្បទានចំនួន២កន្លែងបន្ថែមទៀតក្នុងឧទ្យានជាតិ វីរៈជ័យទៅឲ្យក្រុមហ៊ុនឯកជននេះ បានធ្វើឲ្យទំហំដីសម្បទានក្នុងឧទ្យានដែលចុះបញ្ជីជាបេតិកភណ្ឌ អាស៊ាននេះ កើនដល់៥៤៧២៥ហិកតាហើយ។
យោងតាមគេហទំព័រវីគីភីឌា ឧទ្យានជាតិវីរៈជ័យមានទីតាំងនៅភាគឦសានប្រទេសកម្ពុជា លាតសន្ធឹងគ្របដណ្តប់ខេត្តរតនគិរី និងស្ទឹងត្រែង។ ឧទ្យាននេះមានព្រំប្រទល់ជាប់ប្រទេសលាវ និងវៀតណាម ហើយមានផ្ទៃក្រឡា ៣៣២៥គីឡូម៉ែត្រក្រឡា។ ឧទ្យានវីរៈជ័យត្រូវគេចាត់ទុកជាដែនជម្រកមួយសម្រាប់ពពួក ថនិកសត្វធំៗរបស់ប្រទេសកម្ពុជាមានដូចជាខ្ទីង ទន្សោង ក្របីព្រៃ ដំរី ខ្លាដំបង ខ្លារខិន ជាដើម។ ឧទ្យាននេះក៏ជាដែនជម្រកព្រៃឈើសើមរយៈកម្ពស់មធ្យមប្រមាណជាង៧៥ ភាគរយនៃផ្ទៃប្រទេសផងដែរ៕
No comments:
Post a Comment