ដោយ វិជ័យ អានន្ទ 2012-08-05
អ្នកភូមិម្នាក់ដែលគេសង្ស័យថា ត្រូវថ្នាំពុលរបស់ជនជាតិវៀតណាម នៅស្រុកមុខកំពូល ខេត្តកណ្ដាល ត្រូវគេបញ្ជូនដល់ផ្ទះសាច់ញាតិនាភូមិថ្មី ឃុំស្វាយអំពា វិញហើយ ហើយអាការៈជំងឺលោកមិនទាន់បានសះស្បើយនៅឡើយ។
លោក ម៉ាត់ ផល្លី ដែលអ្នកភូមិអះអាងថា ត្រូវថ្នាំពុលនោះ បានចាកចេញពីភូមិថ្មី ឃុំស្វាយអំពា កាលពីថ្ងៃទី៣ សីហា ជាកន្លែងកើតហេតុ ត្រូវសាច់ញាតិនាំមកដល់ភូមិកំណើតខ្លួនវិញហើយ ហើយលោកកំពុងស្នាក់នៅផ្ទះបងបង្កើតរបស់គាត់។
អ្នកស្រី សយ គុន្ធា ជាភរិយាលោក មាត់ ផល្លី អះអាងថា អាការៈជំងឺប្ដីរបស់អ្នកស្រីហាក់មិនបានធូរស្បើយឡើយ នៅថ្ងៃទី៤ សីហា នេះ។ ផ្ទុយទៅវិញអាការៈជំងឺរបស់គាត់កាន់តែធ្ងន់ធ្ងរទៅៗ បន្ទាប់ពីគាត់ត្រឡប់ពីមន្ទីរពេទ្យមកវិញនោះ។
អ្នកស្រីឲ្យដឹងបន្តថា ប្ដីអ្នកស្រីក្អួតចង្អោរញឹកញាប់ជាងកាលពីថ្ងៃទី៣ សីហា កន្លងទៅ ព្រោះឥឡូវគាត់ក្អួត ៥នាទីម្ដង ឬ ៣នាទីម្ដង ហើយតាំងពីថ្ងៃទី៣ សីហា មក គាត់មិនទាន់បានហូបបាយបានបន្តិចបន្តួចនៅឡើយ៖ «គាត់កំពុងតែក្អួត ក្អួតញឹកញាប់ណាស់ឥឡូវ»។
អ្នកស្រី ភូ វន ជាម្ដាយលោក ម៉ាត់ ផល្លី ដែលនៅថែទាំលោក មាត់ ផល្លី នៅឯមន្ទីរពេទ្យ អ្នកស្រីបង្ហាញការងឿងឆ្ងល់ថា មិនដឹងមកពីមូលហេតុអ្វីបានជាកូនអ្នកស្រីចេះតែក្អួតរហូតឥតឈប់ ឈរ តាំងពីបញ្ជូនដល់មន្ទីរពេទ្យកាល់ម៉ែត។
អ្នកស្រីបន្តថា បន្ទាប់ពីបានចូលដល់មន្ទីរពេទ្យកាល់ម៉ែតបានមួយយប់ លុះព្រឹកឡើងនៅថ្ងៃទី៤ សីហា អ្នកស្រីត្រូវបង្ខំចិត្តបញ្ជូនកូនចេញពីមន្ទីរពេទ្យនោះ បើទោះបីកូនអ្នកស្រីនៅមិនទាន់ធូរស្បើយពីជំងឺក៏ដោយ ព្រោះអ្នកស្រីគ្មានលុយឲ្យថ្លៃថ្នាំពេទ្យ៖ «ខ្ញុំសុំគេយកមកផ្ទះ ព្រោះអត់លុយមើល»។
លោក ម៉ាត់ ផល្លី ត្រូវគេសង្ស័យថា លោកត្រូវថ្នាំពុលរបស់ជនជាតិវៀតណាមម្នាក់ ដែលអ្នកភូមិអះអាងថា ជាមនុស្សចម្លែកដែលចូលទៅក្នុងភូមិថ្មី ហើយមានបំណងចង់ចាប់ក្មេងកំពុងឃ្វាលគោក្បែរភូមិនោះ បន្ទាប់ពីលោកបានរត់ទៅជួយឃាត់បុរសជនជាតិវៀតណាម ឲ្យឈប់ដេញក្មេងៗទាំងនោះ។
ទោះយ៉ាងណាអាជ្ញាធរមានសមត្ថកិច្ចមិនទាន់អាចបញ្ជាក់ឲ្យបាន ច្បាស់លាស់នៅឡើយ ទាក់ទងនឹងការសង្ស័យរបស់អ្នកភូមិថា លោក ម៉ាត់ ផល្លី ត្រូវថ្នាំពុល ឬយ៉ាងណានោះទេ។ ចំណែកឯក្រុមគ្រូពេទ្យកាល់ម៉ែត ដែលសាច់ញាតិលោក ម៉ាត់ ផល្លី បាននាំយកទៅនោះ ក៏មិនបានបញ្ជាក់ថា លោក ម៉ាត់ ផល្លី ត្រូវថ្នាំ ឬយ៉ាងណានៅឡើយដែរ។
កាលពីថ្ងៃទី៣ សីហា ឆ្នាំ២០១២ អ្នកភូមិនៅឃុំស្វាយអំពា ស្រុកមុខកំពូល ខេត្តកណ្ដាល បានផ្អើលឆោឡោថា មានជនជាតិវៀតណាម ដេញចាប់ក្មេង ហើយអ្នកភូមិទាំងនោះបានព័ទ្ធចាប់ជនជាតិវៀតណាមរូបនោះ ហើយវាយយ៉ាងខ្លាំងរហូតបុរសជនជាតិវៀតណាម នោះសន្លប់។
អ្នកភូមិអះអាងថា ជនជាតិវៀតណាមរូបនោះបានប្រើថ្នាំពុលបាញ់លើអ្នកភូមិ ហើយអ្នកភូមិដែលត្រូវថ្នាំពុលខ្លាំងជាងគេ គឺលោក ម៉ាត់ ផល្លី ដោយហេតុថា គាត់បានចូលកៀកនឹងជនជាតិវៀតណាម នោះជាងគេ។
ទាក់ទងនឹងរឿងរ៉ាវល្បីថា មានមនុស្សចាប់ក្មេងនេះ អ្នកភូមិថ្មី ឃុំស្វាយអំពា ស្រុកមុខកំពូល មួយចំនួននៅតែព្រួយបារម្ភចំពោះករណីនេះ បើទោះបីជាមានអាជ្ញាធរធ្លាប់បានបញ្ជាក់ថា គ្មានករណីនេះកើតឡើងក៏ដោយ៕
Sunday, August 5, 2012
សម័យដែកចោរ យុវជនខ្មែរអត់មានជំនឿទុកចិត្តខ្លួនឯងនិងប្រព័ន្ធអប់រំជាតិ
 |
| បេក្ខជនខ្លះនាំគ្នាស្រោចទឹកមន្ត |
បេក្ខជននាំគ្នាស្រោចទឹកមន្តនិងទិញវិញ្ញាសារព្រាងត្រៀមប្រឡងថ្ងៃស្អែក
ថ្ងៃ អាទិត្យ 05 សីហា 2012
ដោយ គី សុខលីម
មុនថ្ងៃប្រឡងមួយថ្ងៃ បេក្ខជនប្រឡងបាក់ឌុបនាំគ្នាស្រោចទឹកមន្តនិងទិញវិញ្ញាសារព្រាងត្រៀមប្រឡងថ្ងៃស្អែក។ ការពឹងលើទឹកមន្តឬពឹងលើវិញ្ញាសារព្រាងគឺជារឿងប្រថុយប្រថាន។ អ្វីដែលប្រាកដប្រជានោះគឺចំណេះដឹងពិតរបស់បេក្ខជននីមួយៗ។នៅព្រឹកថ្ងៃអាទិត្យនេះ បេក្ខជនប្រឡងថ្នាក់ទី១២ជាច្រើនរយពាន់នាក់បានមកមើលឈ្មោះប្រឡងទាំងហ្វូងៗនៅតាមសាលានានានៅទីក្រុងភ្នំពេញ។ បន្ទាប់ពីមើលឈ្មោះហើយ ពួកគេនាំគ្នាជជែកគ្នាអំពីមេរៀនខ្លះនិងជជែកគ្នាអំពីវិញ្ញាសារព្រាងសម្រាប់ការប្រឡងថ្ងៃស្អែកខ្លះ។
វិញ្ញាសារព្រាងសម្រាប់ប្រឡងបាក់ឌុបត្រូវបានគេដាក់លក់នៅតាមតូបលក់សៀវភៅនិងលក់កាសែតនៅក្នុងទីក្រុងភ្នំពេញ។ អ្នកលក់វិញ្ញាសារព្រាងបាននិយាយប្រាប់កាលពីព្រឹកមិញថា ពួកគេលក់វិញ្ញាសារដាច់ច្រើនណាស់នៅថ្ងៃនេះ។ សិស្សជាច្រើននាក់បាននាំគ្នាមកឈរតំរៀបគ្នាចាំទិញវិញ្ញាសារព្រាងត្រៀមប្រឡងនៅម្តុំវិទ្យាល័យបឹងកេងកងនៅកណ្តាលទីក្រុងភ្នំពេញ។
បេក្ខជនខ្លះមមាញឹកនឹងទិញវិញ្ញាសារព្រាងប៉ុន្តែសិស្សខ្លះទៀតបាននិយាយប្រាប់វិទ្យុបារាំងទាំងចុងមាត់ចុងករថា ពួកគេបានទៅទទួលទឹកមន្តពីព្រះសង្ឃរួចហើយ។ ទទួលទឹកមន្តពីព្រះសង្ឃអាចជួយពួកគេបានខ្លះដូចជាកុំអោយភ័យជាដើម។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យបានពន្យល់ថា ទាំងវិញ្ញាសារព្រាង ទាំងការស្រោចទឹកគឺមិនអាចជួយបេក្ខជនអោយប្រឡងជាប់ទេ។ ការស្រោចទឹកគឺជាផ្នែកមួយនៃប្រពៃណីរបស់ខ្មែរតែប៉ុណ្ណោះ។ រឿងជាប់ឬធ្លាក់គឺវាទាក់ទងទៅនឹងចំណេះដឹងផ្ទាល់ខ្លួនរបស់សិស្សម្នាក់ៗ។ រីឯ ចំពោះវិញ្ញាសារព្រាងវិញ លោក រ៉ុង ឈុន បានបញ្ជាក់ថា គឺជាការប្រថុយប្រថានបំផុត។ ដូច្នេះ សូមបេក្ខជនកុំពឹងលើវិញ្ញាសារហេងស៊យនោះ។
ការប្រឡងបាក់ឌុបនៅក្នុងប្រទេសកម្ពុជានឹងចាប់ផ្តើមនៅថ្ងៃចន្ទស្អែក ហើយបញ្ចប់ទៅវិញនៅថ្ងៃពុធសប្តាហ៍ក្រោយនេះ។ បេក្ខជនប្រឡងបាក់ឌុបនៅឆ្នាំនេះមានចំនួនជាង១១ម៉ឺននាក់។
ដើម្បីរក្សាការប្រឡងអោយប្រព្រឹត្តទៅប្រកបដោយសច្ចយុត្តិធម៌នោះ ក្រសួងអប់រំបានចេញបទបញ្ញត្តមួយបិទនៅតាមមណ្ឌលប្រឡងដោយបញ្ជាក់ថា បេក្ខជនណាធ្វើជាមេខ្លោងប្រមូលលុយ ឬណែនាំបេក្ខជនដទៃអោយប្រមូលលុយឬយកលុយទៅអោយអនុរក្សនឹងត្រូងអោយធ្លាក់ជាស័្វយប្រវត្តិនិងផ្អាកមិនអោយប្រឡងរយៈពេល១ឆ្នាំ។
បេក្ខជនលួចចម្លងចម្លើយពីឯកសារព្រាងនឹងត្រូវទទួលបានពិន្ទុសូន្យហើយត្រូវបញ្ឈប់មិនអោយប្រឡងបន្តទៀតនៅក្នុងសម័យប្រឡងនេះតែម្តង។ បេក្ខជនណាប្រើប្រាស់ទូរស័ព្ទនៅក្នុងបន្ទប់ប្រឡងនឹងត្រូវអោយធ្លាក់ជាស័្វយប្រវត្តិនិងផ្អាកមិនអោយចូលរួមប្រឡងរយៈពេល២ឆ្នាំ៕
http://ki-media.blogspot.com/2012/08/under-hun-xen-cambodian-children-no.html#more
Saturday, August 4, 2012
កិច្ចសន្ទនានយោបាយ ៖ ការស្វែងរកអន្តរាគមន៍ពីអន្តរជាតិ របស់ចលនាប្រជាធិបតេយ្យសង្គ្រោះជាតិ
ពុធ 01 សីហា 2012
លោក កឹម សុខា ប្រធានគណបក្សសិទ្ធិមនុស្ស និង លោក ស្រី មូរ សុខហួរ អគ្គលេខាធិការរងគណបក្សសមរង្ស៊ី បានចាកចេញពីប្រទេសកម្ពុជាហើយកាលថ្ងៃទី៣១ កក្កដា ប្រយោជន៏ដើម្បីធ្វើការណែនាំឲ្យដល់សកម្មជនរបស់ខ្លួននៅក្រៅប្រទេសឲ្យយល់ពីរបត់នយោបាយថ្មីរបស់ គណបក្សទាំងពីរ នឹង ស្វះស្វែងរកការគាំទ្រពីអន្តរជាតិមាន ដូចជា សហរដ្ឋអាមេរិក សហគមន៏អឺរ៉ុប និងជប៉ុន ដែលសុទ្ធតែមានឥទ្ធិពលមកលើប្រទេសកម្ពុជា ធ្វើយ៉ាងណាកែទម្រង់ប្រព័ន្ធបោះឆ្នោតនៅក្នុងប្រទេសនេះ និងត្រួសត្រាយផ្លូវឲ្យមេដឹកនាគណបក្សប្រឆាំងគឺលោក សម រង្ស៊ី បានវិលចូលស្រុកចូលរួមការបោះឆ្នោតជាតិនាឆ្នាំ២០១៣ខាងមុខ។
សូមស្តាប់កិច្ចសន្ទនានយោបាយ រវាងលោក យូ សារ៉ាវុឌ្ឍ និងលោក ឡឹម ពិសិដ្ឋអគ្គនាយកសារព័ត៌មានសេរីអំពីបញ្ហានេះដូចតទៅ ៖
Podcast: Play in new window | Download (3.8MB)
លោក កឹម សុខា ប្រធានគណបក្សសិទ្ធិមនុស្ស និង លោក ស្រី មូរ សុខហួរ អគ្គលេខាធិការរងគណបក្សសមរង្ស៊ី បានចាកចេញពីប្រទេសកម្ពុជាហើយកាលថ្ងៃទី៣១ កក្កដា ប្រយោជន៏ដើម្បីធ្វើការណែនាំឲ្យដល់សកម្មជនរបស់ខ្លួននៅក្រៅប្រទេសឲ្យយល់ពីរបត់នយោបាយថ្មីរបស់ គណបក្សទាំងពីរ នឹង ស្វះស្វែងរកការគាំទ្រពីអន្តរជាតិមាន ដូចជា សហរដ្ឋអាមេរិក សហគមន៏អឺរ៉ុប និងជប៉ុន ដែលសុទ្ធតែមានឥទ្ធិពលមកលើប្រទេសកម្ពុជា ធ្វើយ៉ាងណាកែទម្រង់ប្រព័ន្ធបោះឆ្នោតនៅក្នុងប្រទេសនេះ និងត្រួសត្រាយផ្លូវឲ្យមេដឹកនាគណបក្សប្រឆាំងគឺលោក សម រង្ស៊ី បានវិលចូលស្រុកចូលរួមការបោះឆ្នោតជាតិនាឆ្នាំ២០១៣ខាងមុខ។
សូមស្តាប់កិច្ចសន្ទនានយោបាយ រវាងលោក យូ សារ៉ាវុឌ្ឍ និងលោក ឡឹម ពិសិដ្ឋអគ្គនាយកសារព័ត៌មានសេរីអំពីបញ្ហានេះដូចតទៅ ៖
Podcast: Play in new window | Download (3.8MB)
Subscribe to:
Posts (Atom)