ការយកសាំងមួយដប់ ចាក់ដុតខ្លួន ព្រោះតែរឿងតូចចិត្ត ដោយការធ្វើទុក្ខបុកម្នេញ និងអំពើពុករលួយដោយយុវជនទុយណេស៊ីកាលពីចុងឆ្នាំកន្លងទៅ បានក្លាយទៅជាបុព្វហេតុបដិវត្តន៏ដែលនាំឲ្យមានការផ្លាសប្ដូរយ៉ាងសម្បើមនៅពិភពអារ៉ាប់ ។ ពោលគឺយុគសម័យ នៃពពួកមេដឹកនាំផ្ដាច់ការត្រូវតែបញ្ចប់ ដែលមិនត្រឹមតែទុយណេស៊ីប៉ុណ្ណោះទេ ប៉ុន្តែវាបានបន្តរាលដាលយ៉ាងពុះកញ្ជ្រោលដល់ អេហ្ស៊ីប លីប៊ី ហើយពេលនេះ នៅប្រទេស ស៊ីរី , ដែលពលរដ្ឋប្រទេសនេះ កំពុងធ្វើការតស៊ូយ៉ាងក្រាញននៀល ដើម្បីបណ្ដេញមេដឹកនាំរបស់គេ ឈ្មោះ បាសា អាសាដ ចេញពីអំណាច ។
តាមពិតដបសាំងវាគ្រាន់តែជាបច្ច័យមួយប៉ុណ្ណោះដើម្បីជួសទម្លាយភាពឈឺចាប់ដ៏តានតឹងស្ទើរប្រេះទ្រូងរបស់ពលរដ្ឋទុយណេស៊ី ។ ពលរដ្ឋទុយណេស៊ីដែលបានទទួលរងនូវសេចក្ដីទុក្ខសោកយ៉ាងដក់ស្រាំ ពីអំពើពុករលួយ បក្ខពួក គ្រួសារនិយម អំពើផ្ដាច់ការ …ពីសំណាក់រដ្ឋាភិបាល បេនអាលី អស់រយៈពេលជាង៣០ឆ្នាំមកហើយ ហើយការដុតខ្លួន វាបានជម្រុញឲ្យពលរដ្ឋលីប៊ីឈានដល់ការសម្រេចចិត្តចុងក្រោយ មួយ ដែលត្រូវតែបញ្ចប់វាសនាអំណាចរបស់បេនអាលី ។ពេលនេះទុយណេស៊ី មានរដ្ឋាភិបាលមួយថ្មីហើយ ពលរដ្ឋប្រទេសនេះ បានញញឹមញញែម ចំពោះសមិទ្ធផល ដែលគេទទួលបាន ដែលវាបានក្លាយទៅជាសារប្រាប់ពិភពលោកថា គ្មានជ័យជំនះណាដែលកើតឡើង ដោយពុំមានការតាំងចិត្តនិងពលិកម្មនោះទេ ។ មានន័យថា ពួកមេដឹក នាំផ្ដាច់ការនិងពុករលួយ គេនឹងមិនចុះចេញពីអំណាច ដោយសម្លេងទាមទារស្រួលៗរបស់មហាជនឡើយ ។ នោះមានតែម្យ៉ាងគត់គឺការធ្វើបដិវត្តន៍។ ហើយបដិវត្តន៏ទុយណេស៊ី ដែលគេឲ្យឈ្មោះថា បដិវត្តន៏ផ្កាម្លិៈនោះ បានធ្វើជាគម្រូប្រកបដោយជោគជ័យភ្លាមៗផងដែរ សម្រាប់ពលរដ្ឋអេហ្ស៊ីប ក្នុងការក្រោកឡើង បណ្ដេញមេដឹកនាំរបស់គេ ឈ្មោះហូស្នី មូបារ៉ាក់ ។
ចំណែកភាពរងគ្រោះរបស់ប្រជាពលរដ្ឋខ្មែរនាពេលនេះវិញ ត្រូវគេមើលឃើញថា ហាក់មានទម្ងន់ធ្ងន់ធ្ងរ ជាងទុយណេស៊ីទៅទៀត ។ ធ្ងន់ត្រង់ថា ពលរដ្ឋខ្មែរពេលនេះ ពុំមែនរងគ្រោះដោយសារតែអំពើពុករលួយ គ្រួសារនិយម បក្ខពួកនិយម តែមួយមុខប៉ុណ្ណោះទេ , អ្វីដែលសំខាន់នោះគឺដំណើរទៅរកការបាត់បង់ប្រទេសទាំងមូលក្រោមដៃរដ្ឋាភិបាលបច្ចុប្បន្នតែម្ដង។ចុះហេតុអី្វក៏យើងពុំមានវាសនាដូចទុយណេស៊ី ?
យោងតាមរបាយការណ៍ចុងក្រោយ របស់អង្គការសិទ្ធិមនុស្សអាដហុក ដែលចេញផ្សាយ កាលពីចុងសប្ដាហ៏កន្លងទៅនេះថា មិនដល់រយៈពេល៤ឆ្នាំផង គឺចាប់ពីឆ្នាំ២០០៨ដល់២០១១ រដ្ឋាភិបាល បានធ្វើសម្បទានដីធ្លី ដែលក្នុងនោះ មានរាប់បញ្ចូលទាំងផ្ទៃដីព្រៃឈើ តំបន់ រ៉ែ ដល់ទៅជាង ៧លានហិកតារ ឲ្យក្រុមហ៊ុនឯកជន ចំនួន ២២២ ទាំងក្នុងនិងក្រៅស្រុក ។
ការធ្វើសម្បទាននិងវិនិយោគដីធ្លីរយៈពេលវែង ដែលជាភាសាពីរោះស្ដាប់ដើម្បីបិទបាំងដល់ ការលក់ដីខ្មែរតាមរបៀបឆៅៗនោះ បានធ្វើឲ្យប៉ះពាល់យ៉ាងធ្ងន់ធ្ងរ ដល់ជីវភាព រស់នៅរបស់ប្រជាពលរដ្ឋខ្មែរ ។ ហើយការក្រោកឡើងប្រឆាំងតវ៉ា បានកើតមានស្ទើរតែគ្រប់ទីកន្លែង ទូទាំងកម្ពុជា ។
ដោយសារតែការបាត់បង់ផ្ទះសម្បែង តាមរយៈគម្រោងវិនិយោគតំបន់បឹងកក់ ទៅឲ្យក្រុមហ៊ុន ស៊ូកាគូអ៊ីន កាលពីប៉ុន្មានខែមុននេះ មន្ត្រីប៉ូលិសម្នាក់ បានលោតទឹកសម្លាប់ខ្លួន ក៏ដូចជាការក្រោកឡើងតវ៉ាជាក្រុមៗច្រើនទៀតដោយពលរដ្ឋសហគមន៍ព្រៃឡង់ ប្រឆាំងរដ្ឋាភិបាលដែលបានធ្វើសម្បទានដីនៅតំបន់ ព្រៃឡង់ទៅឲ្យក្រុមហ៊ុន យួន ។ ការបាត់បង់ព្រៃឡង់នឹងធ្វើឲ្យប្រជាពលរដ្ឋ ប្រមាណ៤ខេត្តដែលនៅជាប់ព្រៃឡង់ បាត់បង់មុខរបរ បាត់បង់ជីវភាព ដែលប្រៀបបាននឹងការសម្លាប់ពួកគេ ។ ហើយ អ្វីដែលអាក្រក់បំផុតក្រុមហ៊ុនយួនទាំងនោះ វាបានបញ្ជូនកម្មកររបស់វា មកឲ្យបំរើការ ដែលជាការបង្ហាញឲ្យឃើញយ៉ាងច្បាស់ពីនយោបាយលេបទឹកដីខ្មែររបស់យួន គឺនៅពេលដែលគេដណ្ដើមបានឆ្នាំងបាយហើយ សម្លាប់ខ្មែរបណ្ដើៗ គេក៏បានដាក់ជំនួស ពលរដ្ឋរបស់គេ មកលើដីខ្មែរជាបណ្ដើរៗដែរ ។
ប៉ុន្តែការក្រោកឡើងប្រឆាំងរបស់ពលរដ្ឋខ្មែរហាក់ដូចគ្រាន់តែជាការរំភើបមួយភ្លែតៗ និងនៅរាយប៉ាយរកចំណុចប្រសព្វគ្នាឲ្យពុំឃើញឡើយ ដែលជាញយដង តែងតែទទួលរងបរាជ័យ ពីការបង្ក្រាបដោយអាជ្ញាធរយ៉ាងព្រៃផ្សៃបំផុត ។ ដូច្នេះដើម្បីភាពជោគជ័យ ដើម្បីកម្ពុជាទទួលបានទំព័រថ្មី ចាកផុតពីសេចក្ដីទុក្ខសោកដែលយើងគ្រប់គ្នាបានទទួលអស់រយៈពេលជាង៣០ឆ្នាំមកនេះ យើងគួរតែសម្លឹងមើលការបដិវត្តន៍របស់ទុយណេស៊ី ដោយយកការឈឺចាប់ សេចក្ដីទុក្ខសោករបស់ជនជាតិយើង ជាសេចក្ដីទុក្ខសោករួម ហើយវេញគ្នាជាធ្លុងឲ្យទៅជាកម្លាំងឯកភាពជាតិតែមួយស្ទុះក្រោកឈរឡើង ។ បើខ្មែរស្រុសគ្នា នោះអាជ្ញាធរ ហ៊ុន សែន មិនអាចធ្វើអ្វីយើងបានទេ ហើយយើងនឹងទទួលបានជ័យជំនះ ជាក់ជាមិនខាន , មិនមែនជ័យជម្នះដែលផ្ដើមចេញពីដបសាំងដូចនៅទុយណេស៊ី តែជាជ័យជម្នះដែលផ្ដើមចេញពីបដិវត្តន៍ដីធ្លី ៕
No comments:
Post a Comment