| វាជាដំណឹងដ៏សោកសៅមួយសម្រាប់ពលរដ្ឋខ្មែរ នៅពេលឮថា ជនរួមជាតិរបស់ខ្លួន ៣នាក់ទៀត ហើយត្រូវបានទាហានសៀមបាញ់ឲ្យស្លាប់យ៉ាងអាណោចអាធ័មបំផុត ក្នុងទឹកដីសៀមជាប់ព្រំដែនខេត្ត ឧត្តរមានជ័យកាលពីថ្ងៃទី២២ខែវិច្ឆិកាថ្មីៗ ។ |
អំពើព្រៃផ្សៃអមនុស្សធម៌បែបនេះ របស់ទាហានសៀមមកលើពលរដ្ឋខ្មែរ គេឃើញកើតមានយ៉ាងញឹកញាប់ អំឡុង
រដ្ឋាភិបាលសៀមគ្រប់គ្រងដោយនាយករដ្ឋមន្ត្រី អាប់ភីស៊ីត វាចាជីវ៉ា ។ គ្រានោះបើទោះបីជាមានការស្លាប់ ក៏ទម្ងន់នៃក្ដីរន្ធត់ ហាក់ដូចជាពុំសូវធ្ងន់ធ្ងរប៉ុន្មានទេ ដោយខ្មែរគ្រប់រូបគិតថា ធ្វើម៉េច រដ្ឋាភិបាលទាំងពីរជាសត្រូវនឹងគ្នា ដូច្នេះក្ដីសម្អប់ ការឈ្នានីសកាប់សម្លាប់គ្នា តែងកើតមានអញ្ចឹង ។ប៉ុន្តែពេលនេះទំព័រអាប់ភីស៊ីតត្រូវបានផ្លាស់ប្ដូរហើយ ។ អំឡុងទស្សនកិច្ចកាលពីពាក់កណ្ដាលខែកញ្ញារបស់ នាយករដ្ឋមន្ត្រីថ្មីសៀម លោកស្រី យីង ឡាក់ ស៊ីណាវ៉ាត្រា ជាប្អូនបង្កើតរបស់ថាក់ស៊ីន មិត្តចាក់ទឹកមិនលិចរបស់ ហ៊ុន សែន , រដ្ឋាភិបាលក៏បានប្រកាសនូវពាក្យ ជយោ! កម្ពុជា-ថៃ ។ ជាមួយការលើកទម្យើរថា រដ្ឋាភិបាលថ្មីរបស់សៀមនេះ នឹងផ្ដើមឲ្យមានទំនាក់ទំនងល្អ ជាមួយកម្ពុជា ទាំងបញ្ហាប្រាសាទ ព្រះវិហារ ព្រំដែន និង បញ្ហាផ្សេងៗទៀត..។ ពោលសម្រាប់អារម្មណ៍ពលរដ្ឋខ្មែរគឺនឹងគ្មានដំណឹង ពីការកាប់សម្លាប់ពលរដ្ឋខ្មែរតាមរបៀបឆៅៗដោយទាហានសៀម ដូចមុនទៀតទេ ។ រដ្ឋាភិបាលទាំងពីរអាចយោគយល់គ្នាបាន ។ ប៉ុន្តែមិនដូច្នេះឯណា តាំងតែពី យីង ឡាក់ ឡើងគ្រប់គ្រងអំណាចមក ឈាមខ្មែរក៏នៅ តែបន្តរហូរដដែល មិនឈប់ឈរ មិនខុសពីរដ្ឋាភិបាលសៀមកាលគ្រប់គ្រងដោយអាប់ភីស៊ីត ប៉ុន្មានឡើយ ។
ផ្ទុយទៅវិញជាមួយអ្វីដែលគេកត់សម្គាល់ឃើញ ប្រសិទ្ធិភាពដែលផ្ដើមពីពាក្យយោគយល់នោះ គឺចាប់តាំងពី រដ្ឋាភិបាលសៀមគ្រប់គ្រងដោយ យីង ឡាក់ រាល់ការបាញ់សម្លាប់ ឬធ្វើទារុណកម្មមកលើពលរដ្ឋខ្មែរដោយទាហានសៀម គេពុំសូវឃើញក្រសួងការបរទេសខ្មែរចេញកំណត់ទូត ឬ រកយុត្តិឲ្យជនរងគ្រោះឡើយ ខណៈកាលពីរដ្ឋាភិបាល អាប់ភីស៊ីត ម្ដងម្កាល គេឃើញមានការចេញកំណត់ទូត ថ្កោលទោស ទង្វើដ៏ព្រៃផ្សៃរបស់ទាហានសៀមនោះ , តើនេះឬជាការយល់យោគ ? ។ គឺវាពិតជារឿងដ៏ខកចិត្តបំផុត សម្រាប់ពលរដ្ឋខ្មែ រទូទៅ ដែលគួរតែមានរដ្ឋាភិបាលមួយចេះយកអសាការពារខ្លួន។
ប៉ុន្តែគ្មានទេ ជាញយដងពលរដ្ឋក្រីក្រខ្មែរត្រូវបានសៀមសម្លាប់តាមគ្រប់រូបភាព ក្រៅប្រព័ន្ធច្បាប់ ដែលជនប្រព្រឹត្តពុំដែលត្រូវបានគេថ្កោលទោសឡើយ ។ ក្នុងនោះ រូបភាពសម្លាប់ដ៏សាវបំផុតគឺការកាត់ ក្បាលកម្មករខែ្មរម្នាក់ នៅចំការធុរេន ក្នុងខេត្តរ៉ាក់យ៉ង កាលពីប៉ុន្មានឆ្នាំមុន និង ការចងដុតពលរដ្ឋខ្មែរទាំងរស់ដោយទាហានសៀម ក្នុងឆ្នាំនេះ។ល។និង។ល។ ទង្វើទាំងនេះរបស់ពួកទាហានសៀម វាគឺជារឿងដ៏អមនុស្សធម៌បំផុត ដែលមិនអាចអត់ឱនឲ្យបានឡើយ ។
ទាក់ទងបញ្ហានេះបើតាមមជ្ឈដ្ឋានពួកអ្នកវិភាគខ្លះមើលឃើញថា ភាពមិនឈឺឆ្អាលចំពោះមរណៈភាពពលរដ្ឋខ្លួន របស់រដ្ឋាភិបាលខ្មែរ វាមិនត្រឹមតែធ្វើឲ្យរដ្ឋាភិបាលនេះបាត់តម្លៃជាតំណាង ឲ្យជនជាតិខ្មែរប៉ុណ្ណោះទេ តែវាក៏ជាកត្តាជួយសម្រួលឲ្យមានការកាប់សម្លាប់ជនជាតិខ្មែរ ដោយទាហានសៀមផងដែរ ។ ព្រោះការសម្លាប់ដោយគ្មានការប្រឆាំងតបតរកយុត្តិធម៌ វានឹងនាំឲ្យមានការកាប់សម្លាប់ម្ដងហើយម្ដងទៀត ។
ដូច្នេះពាក្យ “ជយោ!” របស់រដ្ឋាភិបាលខ្មែរចំពោះរដ្ឋាភិបាលថ្មី សៀម មានន័យអ្វីទៀតទៅ ? បើ ឈាមខ្មែរនៅតែហូរដោយចុងកាំភ្លើងសៀម , ពលរដ្ឋខ្មែរជាបន្តបន្ទាប់នៅតែត្រូវបានគេសម្លាប់ដូចសត្វធាតុនោះ ៕
No comments:
Post a Comment