ប្រាសាទអង្គរវត្តមើលពីលើអាកាស
សេចក្តីថ្លែងការណ៍របស់ក្រុមប្រឹក្សាឃ្លាំមើលកម្ពុជាបានលើកឡើង ថា ប្រាសាទអង្គរវត្តខ្មែរ គឺជាអត្តសញ្ញាណ នៃដួងព្រលឹងរបស់ជាតិខ្មែរ ដោយត្រូវបានអង្គការយូណេស្កូ ដាក់ចូលជាសម្បត្តិបេតិកភណ្ឌពិភពលោក។ ដូច្នេះរាជរដ្ឋាភិបាលកម្ពុជាត្រូវការពារកម្មសិទ្ធិបញ្ញារបស់ខ្លួន មិនត្រូវបណ្ដោយឱ្យប្រទេសឥណ្ឌា ចម្លងយកប្រាសាទអង្គរវត្តខ្មែរទាំងស្រុង ទៅសាងសង់ប្រាសាទអង្គរវត្ត នៅក្នុងប្រទេសឥណ្ឌានោះឡើយ។ ដោយថា ការដែលប្រទេសឥណ្ឌា សាងសង់ប្រាសាទអង្គរវត្ត ដោយចម្លងយកប្រាសាទអង្គរវត្តខ្មែរទាំងស្រុងបែបនេះ គឺជាការប៉ះពាល់យ៉ាងធ្ងន់ធ្ងរដល់អត្តសញ្ញាណជាតិខ្មែរ និងកម្មសិទ្ធិបញ្ញារបស់កម្ពុជា។
ជាមួយគ្នានេះ ក្រុមប្រឹក្សាឃ្លាំមើលកម្ពុជា បានសម្តែងការព្រួយបារម្ភ និងកង្វល់យ៉ាងខ្លាំង បន្ទាប់ពីបានឮមន្ត្រីជាន់ខ្ពស់រាជរដ្ឋាភិបាលកម្ពុជា អះអាងប្រាប់សារព័ត៌មានជាតិ និងអន្តរជាតិថា ប្រទេសឥណ្ឌាសាងសង់ប្រាសាទអង្គរវត្តក្នុងប្រទេសរបស់ខ្លួនក្ដី ក៏មិនធ្វើឱ្យប៉ះពាល់ ដល់កេរិ៍្តឈ្មោះប្រាសាទអង្គរវត្តខ្មែរនោះទេ។ សូម្បីតែរូបសញ្ញារបស់ក្រុមហ៊ុន ឬរូបសញ្ញាសមាគមក្ដី ក៏មិនអាចអ្នកផ្សេងថតចម្លងយកទៅប្រើប្រាស់បានឡើយ។
ប្រាសាទអង្គរវត្តខ្មែរ នៅពេលជនបរទេសបានឃើញរូបអង្គរវត្តភ្លាម ពួកគេនាំគ្នាបន្លឺសម្លេងឡើង គឺកម្ពុជា ប៉ុន្តែដប់ឆ្នាំក្រោយមក នៅពេលប្រទេសឥណ្ឌា បានសាងសង់ប្រាសាទអង្គរវត្តរួចហើយ ដូចហ្នឹងប្រាសាទអង្គរវត្តខ្មែរនោះ ពេលហ្នឹងហើយដែលប៉ះពាល់ដល់អត្តសញ្ញាណខ្មែរយើង។
ជាចុងក្រោយ ក្រុមប្រឹក្សាឃ្លាំមើលកម្ពុជា បានទាមទារឱ្យរដ្ឋាភិបាលកម្ពុជា ត្រូវតែមានវិធានការចំពោះប្រទេសឥណ្ឌា ដែលថតចម្លងរចនាបថប្រាសាទអង្គរវត្តខ្មែរទាំងស្រុង ក្នុងការសាងសង់ប្រាសាទអង្គរវត្ត នៅប្រទេសរបស់ខ្លួននោះ៕
No comments:
Post a Comment