KHMER7THKING: សារជូនពរមើលងាយ

ទិវានារីអន្តរជាតិ ត្រូវបានអង្គការសហប្រជាជាតិកំណត់ជាផ្លូវការយកថ្ងៃទី០៨ ខែមីនា ដើម្បីអបអរដល់នារីទាំងអស់នៅក្នុងពិភពលោក ចំពោះជោគជ័យដែលបានតស៊ូរាប់សតវត្សទាមទារយកសិទ្ធិស្មើគ្នាជាមួយបុរស។ ស្រ្តីអ្នកកសាងប្រវត្តិសាស្រ្តបានប្រយុទ្ធយ៉ាងស្វិតស្វាញនាអតីតកាលប្រឆាំងទល់នឹងការរើសអើងភេទ ការបែងចែកជាតិពន្ធ ភាសា វប្បធម៌ ពណ៌សម្បុរ សេដ្ឋកិច្ច និងនយោបាយ ដើម្បីទទួលបាននូវសេរីភាពពេញលេញ សមភាព យុត្តិធម៌ ដែលទីបំផុតទៅចលនាដ៏ផុសផុលនៅ
ទ្វីបអាមេរិក និងអឺរ៉ុបតាំងតែពីឆ្នាំ១៩០៩ បានទទួលជោគជ័យយ៉ាងត្រចះត្រចង់ ដោយសមាគមសង្គមនិយមអន្តរជាតិបានជួបប្រជុំគ្នានៅក្រុង Copenhagen ប្រទេសដាណឺម៉ាកនាឆ្នាំ១៩១០ សម្រេចបង្កើតទិវានារីជាលក្ខណៈសកល។ នៅឆ្នាំ១៩១១ ទិវានារីអន្តរជាតិត្រូវបានគេប្រារព្ធជាលើកដំបូងនៅប្រទេសអូទ្រីស ដាណាម៉ាក អាល្លឺម៉ង់ ស្វីស ដែលមានបុរស និងនារីជាង១លាននាក់ចូលរួមគាំទ្រ។

ក្រោយមកអង្គការសហប្រជាជាតិបានប្រកាសយកថ្ងៃទី០៨ ខែមីនា ធ្វើជាទិវានារីអន្តរជាតិ ហើយទិវានេះតែងតែប្រារព្ធជារៀងរាល់ឆ្នាំ ដោយប្រទេសខ្លះកំណត់យកជាថ្ងៃឈប់សំរាកទៀតផង។ ទិវានារីអន្តរជាតិឆ្នាំនេះឈានគម្រប់១០១ឆ្នាំ ដោយនារីនៅប្រទេសស្ទើរទាំងអស់លើពិភពលោកបានរួចផុតពីជញ្ជាំងបែងចែកភេទ ហើយនារីកំពុងប្រឡូកយ៉ាងសកម្មក្នុងកិច្ចការសង្គម រួមទាំងនយោបាយ។ តម្លៃនិងកិត្តិយសស្រ្តីត្រូវលើកតម្កើងនៅប្រទេសជឿនលឿន រីឯបណ្តាប្រទេសមួយចំនួនទៀត ស្រ្តីកំពុងដើរតួយ៉ាងសំខាន់ក្នុងការដឹកនាំប្រទេសគួរឲ្យស្ញប់ស្ញែង។ ទិវានេះពិភពលោកប្រារព្ធឡើងមិនសំដៅគោរពចំពោះបុគ្គលណាមួយឡើយ ទាំងបច្ចុប្បន្ន ទាំងអតីតកាល ផ្ទុយទៅវិញគឺជាការរំលឹកដល់វីរភាពរបស់ស្រ្តីជំនាន់មុន ដែលអង់អាចតស៊ូទាមទារយកសិទ្ធិសម្រាប់ខ្លួន និងសម្រាប់ស្រ្តីទាំងអស់នៅក្នុងលោកប្រកបដោយជោគជ័យ។

នៅប្រទេសកម្ពុជា និយមន័យរបស់ទិវានារីអន្តរជាតិនេះ ហាក់ដូចជាកំពុងត្រូវបំភ្លៃពីតថភាពប្រវត្តិសាស្រ្តសកល។ មិនយល់ដឹងពីអត្ថន័យពិត ជារឿងមួយ ប៉ុន្តែបំភ្លៃជារឿងមួយទៀត។ ហេតុការណ៍នេះបានកើតឡើងនៅតាមស្ថាប័នរដ្ឋ និងឯកជនខ្លះដែលបារព្ធទិវានេះ ដោយមានដាក់តាំងរូបថតផ្ទាំងធំៗរបស់លោកជំទាវ ប៊ុន រ៉ានី ហ៊ុន សែន ដោយមានសារជូនពរ ព្រមទាំងអ្នកចូលរួមសំពះគោរព។ បណ្តាញព័ត៌មានខ្លះទៀត បានចុះផ្សាយនូវលិខិតជូនពរពីរដ្ឋមន្រ្តី និងមន្រ្តីជាន់ខ្ពស់ក្នុងរាជរដ្ឋាភិបាលជូនដល់លោកជំទាវយ៉ាងគគ្រឹកគគ្រេង ដែលញ៉ាំងឲ្យទិវានេះមើលទៅរឹតតែមានភាពអធឹកអធមខ្លាំងឡើង។ ធ្វើបែបនេះមិនដឹងថា តើអស់លោកថ្នាក់ដឹកនាំកំពូល ដែលផ្ញើសារលិខិតជូនពរនោះ មិនយល់ដឹងអំពីនិយមន័យពិត ឬមួយចង់នាំគ្នាក្រឡៃទិវានារីអន្តរជាតិ ឬក៏គ្រាន់តែចង់លើកតម្កើងភរិយាលោកនាយករដ្ឋមន្រ្តីឲ្យខ្ពស់ត្រដែតនោះឡើយ។ ចំណុចទាំងបីខាងលើសុទ្ធតែខុសឆ្គងទាំងអស់ ដែលមិនគួរឲ្យកើតមានទាល់តែសោះ។ ខុសឆ្គងត្រង់ថា គ្មាននរណាម្នាក់អាចកែប្រែនូវនិយមន័យនេះបានឡើយ ហើយទិវានេះក៏មិនសំដៅដឹងគុណបុគ្គលណាម្នាក់ ឬជូនពរដល់នរណាមួយដែរ រាប់ទាំងមហាក្សត្រីយ៍ ប្រធានាធិបតី ឬឥស្សរជនកំពូលជាស្រ្តី។ តាមពិតទៅ សារជូនពរអស់ទាំងនោះ វាជាការមើលងាយ និងបណ្តុះបង្អាប់ទៅដល់លោកជំទាវ ប៊ុនរ៉ានី ហ៊ុន សែន ទៅវិញទេ ដែលធ្វើឲ្យប៉ះពាល់ដល់កិត្តិយសរបស់ភរិយាប្រមុខរដ្ឋាភិបាល។

ជាការប្រសើរបំផុត បើអស់លោកថ្នាក់ដឹកនាំកំពូលៗផ្ញើសារលិខិតអបអរសាទរជូនដល់ស្រ្តីខ្មែរនៅទូទាំងប្រទេសក្នុងឱកាសដ៏ថ្លៃថ្លានេះ ហើយលើកទឹកចិត្តឲ្យស្រ្តីចូលរួមកាន់តែសកម្មក្នុងការកសាងសេដ្ឋកិច្ចសង្គម និងជីវភាពនយោបាយ។ លើកតម្កើងសិទ្ធិស្រ្តីកាន់តែខ្លាំង ផ្តល់ឱកាសថែមទៀតឲ្យស្រ្តីកាន់កិច្ចការកំពូល បញ្ឈប់រាល់ការរើសអើង បញ្ឈប់នូវការធ្វើទុក្ខបុកម្នេញ ទាំងនេះជាអ្វីដែលស្រ្តីខ្មែរប្រាថ្នាដូចស្រ្តីនៅប្រទេសជឿនលឿន៕

KHMER7THKING

Sunday, March 11, 2012

សារជូនពរមើលងាយ

No comments:

Post a Comment

Watch Show about Khmers

Sunday, March 11, 2012

សារ​ជូន​ពរ​មើល​ងាយ

No comments:

Post a Comment

Watch Show about Khmers

សារជូនពរមើលងាយ